Wew, Tega Geh Oknum Pelisi Polres Pengkalpinang Ngentem tahanan Budak Bini

PANGKALPINANGPOST.COM (BABEL)- Pradek, ade kabar dak nyamen kek pak pelisi kite di Polres Pangkalpinang, walaupon kejadian tu lah lame, namon kabar e informasi tu sampai kedenger bilong wartawan, dan akher e ade berita yang sempet dinaek di beberape media online urang Pengkal kek Bangkek.

Diberita e bahwa ade oknum pelisi Pengkalpinang inisial ‘ES’ diduga ngentem paksa (perkosa) tahanan urang/budak bini di Polres Pangkalpinang, dan diketaui ‘S’ inisial budak bini tu.

Masyarakat Bangkek kek Belitong sempet tekejot, karena dak nyangka aben oknum pelisi pangkat Bripka tega diduga memperkosa (asusila) budak bini tu. Walau pon budak bini tu begawe ditempat karoke, dan ketangkep pelisi teros ikak tahan gara-gara kasos narkoba.

Ikak dak boleh naktu be, kek urang bini meski pon diurang tu begawe malem ari ditempet karoke, atau gati disebot kek bik-bik kite yang kepok ‘cewek malem’ atau Lc, tau dak Lc tu ape? Lc tu budak bini yang nemen urang laki atau laki urang nyanyi ditempet karoke.

Bik, die urang tu sebener e dak nek jadi Lc tapi karena tepaksa bai nek ngidop anak e kek urang tue/keluarga e, kite tau lah budak bini yang tepaksa begawe malem tu kebanyak e jando.

Lanjot kisah kite tadi, walaupon sebener e berita yang dibace di kuran online urang Bangkek Belitong, tergambar macem cak-cak dak tau atau nek nutop gawe dak senunuh oknum pelisi ES sewakto kawan kite wartawan betanya kek beberape pejabat pelisi yang ade di Kantor Polres Pengkalpinang.

Mungkenlah, karena tu gawe dak senunuh dan ngemalu sesame pelisi, otomatis kite yang anak buah dak jadi sebasing nek memberi informasi tu, ape agik ngejawab pertanyaan dari kawan wartawan, minimal minta izin duluk kek kemendan paling diatas kite.

Tu lah bener, macem ape yang disampaikan kek Wakapolres Pengkalpinang, Kompol Teguh Setiawan saat ditanya langsong kek wartawan media online urang Pengkal, saat tu pak Teguh nek mintak izin duluk kek kemendan e bapak Kapolres.

“Kelak duluk ok bang, kite nek mintak arahan pak Kapolres duluk,”kate pak Teguh sewakto dikonfirmasi kek wartawam.

Akher e informasi tu imang bener, setelah Kasi Propam Polres Pengkalpinang, pak Iptu Candra Harsono ngomong ape ade e tentu la seizin pak Kapolres, bahwa ade perbuatan gawe yang dak senunuh (asusila) dilakukan ‘ES’ oknum pelisi pelaku yang diduga ngentem tahanan budak bini, tapi kasos la ade sebelom die diangkat sebagai Kasi Propam pada tanggel 31 bulan 6 tahon 2021 luk, dan kate e pelisi ES saat ne kasos e agik tengah diproses hukom.

“Saat ni proses hukom e tengah bejalen, terkaet pelanggar e yang bersangkotan kite keneken kek undang-undang kepolisian tentang kode etik,”kate pak Chandra, ari Selasa kemaren (10/8/2021).

Dijelas kek pak Iptu Candra, dalem undang-undang kepolisian ade tige pelanggaran, pertama pelanggaran disiplin,kedue kode etik dan ketige pidum. Dalam kasos ni untok terduga oknum pelisi ES cuma kenek pelanggaran kode etik.

Teros kate e, saat ni kasos pelisi ES imang belom disidang, dan untok proses hukom e lom tau kapan pasti e, karena saat ne ade beberape ikok kasos yang haros diurang selesai duluk kali.

Saking banyak e, ade delapan ikok kasos pelanggaran kode etik di Polres Pengkalpinang, dan baru sikok yang disidangkan, jadi nunggu giliran sikok-sikok untok nyelesai e, termasok kasos dugaan tindakan asusila (dak senunuh) yang dilakokan oknum pelisi kek tahanan urang bini.

“Yang pasti saat ne Bripka ES tengah agik diproses hukom terkait gawe dak senunuh e, untuk keputosan kelak tegantong kek dewan karir,” kate Pak Iptu Chandra. (Redaksi).

(Narasi berita ini disadur dalam bahasa daerah masyarakat Pangkalpinang dan Bangka, Sumber Berita : FaktaBerita.com https://www.faktaberita.co.id/waduh-oknum-polisi-diduga-perkosa-tahanan-wanita-di-mapolres-pangkalpinang/ )