Foto : Yendri. (Ist)
PANGKALPINANG,PPinangpost.com – Mungkin agik inget ok kek ‘filosofi’ orang Bangka’ ni. ‘Ikan Kelik Ikan Seluang. Dak Dirik Dak Urang’, yang arti e “Same Bai’ walaupun cemane.
Nah, lah hampir setaon lebih pandemi Covid-19 ni terkesan e dak sude-sude. Malah pandemi Covid-19 ni pun dianggep merata atau hampir semue lini ikut terdampak tanpa terkecuali orang Bangka’ Belitung termasuk artis Indonesia pon kini tekene pulik dampak e.
Seperti hal e penyanyi dangdut asal pulau Bangka sikok ni, Yendri. Artis ni ngaku akibat dampak dari pandemi Covid-19 ini die justru sepi job menyanyi, jadi nya kini e ade bisnis baru yakni bejual Belacan (terasi) asli pulau Bangka’.
“Semenjak pandemi Corona ne sepi job kinik e. Tapi alhamdulilah ku sekarang ade bisnis lain yakni jual Belacin di Jakarta ni,” ungkap Yendri saat ditemui di warung Lempah Kuning jalan Abduahman Siddiq, Kota Pangkalpinang, Rabu (24/3/2021) malem.
Bisnis belacan ni kata Yendri ini sesungguh e didapet dari daerah Kabupaten Bangka Selatan, alasan e belacan asal Bangka Selatan ini terkenal kualitasnya dan nyamen kek masak-masak ape agik kek ngelempah.
Produk Belacan yang dijual Yendri ni imang khusus dikemas bagus-bagus pake plastik transparan serta ade logo pulau Bangka kek logo udang.
Sementara untuk pemasaran e kate Yendri
saat ni cuma khusus di luar pulau Bangka antara lain Jakarta dan daerah di pulau Jawa. Bahkan nya pun ngaku yakin usaha jual belacan yang digawe kek nya ni bakal sukses ke depan dengan brand produk Belacan Putra Bangka.
Yendri ngaku nya kini makin semangat bisnis belacan ni. Ape agik kate banyak artis Indonesia mesen belacan Bangka kek nya temasuk bos perusahaan TV nasional (Indosiar) ge lah mesen ge.
“Pokok e cita-citaku ni nak jadi taoke belacan. Doakan bai biar ku ni sukses ok?,” seloroh juara KDI dan Finalis LIDA be sambil nya ketabe.
Meski kini sibuk ngurus bisnis baru e Yendri mada nya agik tetep konsisten menekuni dunia hiburan sebagai pedangdut. Bahkan nya mesen kalok ade masyarakat Babel membutuhkan die pacak menghubungi e di akun Instagram nya Yendrikim. (Ryan)