PANGKALPINANGPOST.COM – Imang bener lah kate masyarakat (publik) kuli tinta yang biase kite sebot wartawan atau awak media, saat ne salah sikok pilar demokrasi di negara kite Indonesia, arti e kalok dak salah media atau Pers/wartawan menjadi bagian dari sosial kontrol atau ikot serta dalem mengawasi pemerintah kite, dan tulesan wartawan dalem produk berita dapet memberi pengaroh yang besak terhadep kebijakan dan keputosan urang besak/pejabat yang ade diates atau pusat.
Wartawan atau media lah menjadi fungsi kontrol yang mengawas dan mengawal produk hukom atau undang-undang untuk ditegakkan biar berjalen dengan bener untuk menuju tata kelola pemerintahan yang baek kek bersih, dalem bahasa urang barat (Inggris) nyebot e ‘Good and Clean Goverment’.
Tulesan kawan wartawan jadi produk berita memberk pengaruh yang besak, teros dapet membantu masyarakat kecit dan didenger kek urang besak/pejabat yang ade di pusat dan daerah,
Seperti contoh e, beberape ari luk masyarakat nelayan kampong desa Bakek, Kecamatan Paret Tige Jebus Kabupaten Bangkek Barat.
Cerita e nelayan kite desa Bakek tu sempet bekeloh kesah, ngasih tau kek wartawan bahwa ditempet biase diurang gati nyari atau nangkep ikan di laot Bakek disekitar perairan Telok Kelabat Dalem laot Belinyu la dibantai urang begawe nambang igik (bijih) timah, yang biase disebot be-Ti ponton apung.
Info yang diterima dari nelayan kite desa Bakek, saat tu ade ratosan ponton Ti (Tambang Inkonvensional) apung rajuk kek selam begawe di laot Bakek, agik dalem sikok kawasan perairan Telok Kelabat Dalem laot Belinyu, di due wilayah administrasi pemerintahan Kabupaten Bangkek Barat Mentok dan Kabupaten Bangkek Sungailiat.
Akher e diurang ngadu lah kek wartawan, bahwa gara-gara ade ratosan ponton Ti apung, kapal atau perau mutor nelayan nek pegi ngelaot dak pacak agik liwat ke hadeng urang be-Ti, saking ramai e urang sekaben be-ti rajuk kek selem nambang timah di laot Bakek perairan Telok Kelabat Dalem laot Belinyu dan sekiter e.
Diurang (penambang ponton Ti) cak-cak dak tau, bahwa tempet tu daerah yang dak pacak di gawe untuk nambang timah, karena daerah tu masok daerah tangkep nelayan atau zero tambang sesuai kek perintah Perda Nomor 3 tahon 2020 tentang RZWP3K singkatan dari Rencana Zonasi Wilayah Pesisir dan Pulau-Pulau Kecil Provinsi Kepulauan Bangka belitung.
Teros, karena ade diberita kek kawan wartawan, saat tu aparat penegak hukom (APH) kite pak pelisi Polda Babe, kek Pelisi Polres Bangkek dan Pelisi Polres Bangkek Barat ngerazia Ti ponton rajuk kek selem ilegal ade di laot Bakek dan perairan Telok Kelabat Dalem, walaupon saat tu urang nambang sempet berhenti suat/sedenget.
Imang naknya lah perangai e masyarakat atau urang penambang dak kenek asih dipadeh agik, macem urang tugil.
Pelisi macem diajak diurang maen sembunyik gong, asak Pelisi lingah diurang diem-diem nambang agik disitu, dan ape agik ngerase ade kolektor/bos timah yang ngedeking e, dari sikok due ponton Ti yang begawe, akher e pacak beratos ponton Ti rajuk kek selem begawe gale disitu.
Teros cerita e, la beberape bulan kemaren sebelom ari raya haji (Idul Adha) ponton Ti apung begawe agik di laot Bakek kek perairan Telok Kelabat Dalem laot Belinyu.
Dan masyarakat nelayan kite lah dak tahan agik kek urang nambang timah di laot Bakek di daerah nelayan nyari/nangkep ikan akher e die urang ngadu agik kek kawan wartawan Pengkal kek Bangkek.
Dan imang lah tugas e wartawan tukang buat berita untuk ngasih tau kek urang besak atau pejabat kite Babel ni, dengan maksod kek tujuan ade kelohan atau curhat masyarakat nelayan kite di kampong Bakek supaya kedenger nyampai ke bilong pak Gubernur Erzaldi kite, pak Pelisi yang ade di Polda Babel, Pak Bupati Bangkek Barat, Kapolres Bangkek Barat, kek Kapolres Bangkek.
Selaen tu maksod e informasi yang diberitakan kek kawan wartawan tu nyampai ke urang-urang besak/pejabat yang ade di pusat nu. Biar ade penindakan jadi dak terkesan ade pembiaran oleh pemerintah daerah khusus e APH Babel.
Rupe e dak bulek aben, setelah ramai diberita agik kek wartawan kite di Bangkek.
Bisok e ,kalok dak salah ari Senin tanggel 2 Agustus 2021, Pak Gubernur Erzaldi, kek Pak Kapolda Babel, pak Danrem 045 Gaya, Pak Bupati Bangkek Barat, masyarakat nelayan Bakek dan pihak terkaet laen e.
Diurang pejabat sekaben berkumpol ngade rapet di Rumah Maken Pundok Laot Desa Bakek, untuk nyelesai masalah penambangan hamper nek betengker (konflik) gara-gara ade penambang yang begawe agik be-ti ponton apung di laot Bakek dan perairan Telok Kelabat Dalem laot Belinyu.
Kalok dak cepet diseleaikan, takot e kejadian beberape bulan duluk e pacak terulang agik, masyarakat nelayan kek masyarakat penambang nek saleng bebunuh.
Alhamdulillah, untonglah saat tu APH Babel kite pak Pelisi kek Tentra (TNI) dan Tukoh masyarakat cepet-cepet ngelerai masyarakat nelayan kek masyarakat penambang tengah betengker (konflik), dan diurang dak jadi saleng serang atau bekelai/begasak.
Men dak tu, mun dakde Pelisi kek Tentra dan Tukoh masyarakat kite yang ngedamai diurang, He’ .. pasti ade yang mati (kurban jiwa/tewas).
Keputosan hasel rapat pak Gubernur Erzaldi, kek Pak Kapolda, Danrem, Bupati Bangkek Barat dan Forkopimda laen, bahwa diminta ke penambang atau pemilek ponton ti apung rajuk kek selem diminta untuk menarik ponton Ti apung e keluar dari lokasi.
Dan dakde agik yang nambang paser timah di laot Bakek dan perairan Telok Kelabat Dalem atau di zonasi Perda RZWP3K daerah tangkep nelayan nyari ikan.
Pak Kapolda Babel, Irjen Pol Anang Syarif Hidayat la nue neges kek ikak yang lum lah ngebongkar ponton ti apung e , dan agik maler lah nek begawe di perairan Telok Kelabat Dalem laot Bakek, Batu Dindeng Laot Belinyu dan sekitar situlah pokok e,.
Pasti ditangkep, teros ikak langsong di proses hukom penjara lah tempet ikak kelak e.
Jangen cak-cak nek nyube nantang aparat penegak hukom atau Pelisi walaupon ikak ngerase punya deking Bos Timah.
Ape agik ikak yang nambang paser timah dak be-SPK atau migang surat izin e, mun jamen sekarang ne, nek bintang berape ge ikak punya deking di ates sane, mun gawe salah atau ngelanggar hukom kek deking-deking ikak tulah pacak telentang tebalek ikot diperiksa atau diproses.
Dak usahlah kite bebulek, Kapolda kite pak Anang la tau penambang timah yang begawe di Perairan Telok Kelabat Dalem kek di sekitar situ banyak yang dakde IUP kek SPK.
” Jadi kite la sepakat gale, ikak penambang paser timah yang dakde IUP e, teros dakde SPK secepet akan kite tertibkan, Ultimatum ni supaya ikak cepet keluar ok, kelak perkembangan selanjot e same kek dengan Pak Gubernur,” teges Pak Kapolda, ari Senin kemaren (2/08/2021).
“Mun ari Rabu, kalok ikak lum ngebongkar (bubar) kite dak ingel-ingel akan kite tindak teges karena lah banyak sekali yang begawe di luar,” sebot bapak jenderal bintang due ni.
Naktu lah cerite e bahwa kawan wartawan kite memberik andil dalam tugas e menjalenkan fungsi kontrol e dalam mengawasi dan mengawal penegakan hukom bertujuan untuk membantu pemerintah pusat kek daerah menuju tata kelola pemerintahan yang baik dan bersih.
Jadi ikak jangen salah paham kek wartawan ok, imang lah tuges e tukang buat berita bukan nek ngusel atau cerudik gawe ikak, tapi kadang-kadang ikak sendirik lah yang ngadu kek kawan wartawan dan teros minta diberita e. ikaklah yang nyuroh wartawan ok?
Namon ape pon alasan e gawe yang salah atau melanggar hukom teteplah salah, kite haros berani dan jangen takot ngumong e bahwa gawe kite tu imang salah, dan sebalek e kalok gawe bener jangen sampei dak bener begawe e. (Redaksi)
(Berita ini disadur bahasa daerah Bangkek kek Pengkal)