PangkalpinangPost.Com – “Kinet ka ok’! tukang ngambek laki urang, imang nek nyari mati ka ok!!
Mungken naktu lah ungkapan bik-bik, urang bini atau bini kite, kalok urang rumah kite tau atau sampai ketemu kek mentinak jemok kite. Pastilah kate-kate carut yang dak keruan jatak keluar gale dari isi perot ke mulot bik-bik atau urang bini atau bini urang yang saket ati (cemburu) laki e diambek urang bini/mentinak laen.
Kalok dalem bahasa Indonesia e disebot Perebut laki orang yang disingkat ‘Pelakor’, Kate urang bini di Bangkek nyebot e tukang ngambek laki urang.
Jadi Yak atau mang, ku madeh kek ikak jangen sutek kek ingel-ingel atau cak-cak nek bejemok kek urang bini atau mentinak laen, ikak tau urang bini atau bini kite pacak lebih nekat dari urang laki ape agik kite la jadi laki e (suami).
Mun ikak dak pecaye, nih ko ngisah kek ikak liwat berita ni tapi ikak bace sampei habis ok’.
Nakne cerita e, ade urang bini/mentinak name Aryani umor 35 tahon, ditikem berkali-kali perot, rusok e sampei temati belabor dareh e (tewas), pokok e ngeri mun ningok jasad urang bini tuh saat di otopsi kek dokter.
Bik atau urang bini yan nikem jemok ayak/amang tu, atau Jemok laki e sendirik name bik tu Yeni umor 35 tahon.
Menurot cerite e dari mulot ke mulot, rupe e bik Yeni la nue kesel kek saket ati, karena Aryani urang bini yang bejemok kek laki e la bekali-kali dipadeh, jadilah bejemok kek laki e sudeh tuh la berape kali keceker di urang bedue tengah maen ‘kude-kude’.
Pokok e ikak lah tau maen kude-kude tu ape maksod? Dak perlu ku jelas atau ku tulis dalem bahasa Bangkek kite ok’, terlalo jurok dan melanggar kode etik wartawan.
Nakne kronologis kejadian e’, karena la dak setahan agik la meruap ati e, diperehlah bik Aryani tu dikebon karet, ditingok kek bik Yeni urang bini jemok laki e tengah nyadat karet di kebon milik amang Harun.
Teros, bik Yeni betanya lah, “ngape nya ka sering ngajek lakiku maen kude-kude, sudeh lah (berhentilah-red) ganggu lakiku’, kate bik Yeni saat tu.
Kan kek e’ ukan kek ketakot la dipereh bini urang, justru bik Aryani malah macem kek urang nantang, ngejawab ‘Nek ngape ka, kalok ko nek kek laki ka, sekenek ko sek,”jawab bik Aryani.
Urang bini mane dak emosi kek saket ati nenger jawaban macem ni,” Ooh, ka nih imang nek ngerusek rumah tangga urang, imang nek nyari mati ka ni ok’,kate bik Yeni.
Dak banyek umong, bik Yeni langsong bai gi ngasak mentinak tu pakek pisok (pisau), disitulah terjadi pembunohan bik Aryani tu.
Akibat e, dak nenger dipadeh akher e bik Aryani mati di lokasi tempet kejadian. Bik Aryani mati karena luke ditusuk berkali-kali di perot, pinggang, teros sampei lengan kiri kek kanan keneh sayat kek pisok bik Yeni.
Teros, habis nikem urang bini yang ngambek laki e, bik Yeni langsong menyerah diri pegi kantor Pelisi setempet, dan maksod e daripade nya lari nek pegi sembunyik ke rumah seperadek atau kawan e’,dak urung pasti dicari dan lambet atau cepet pasti ketangkep kek pelisi.
Dan kini bik Yeni yang bunoh mentinak yang ngambek laki e la ditetep sebagai tersangka kek pelisi.
Kejadian berdareh ni di kebon karet Desa Tapus, Kecamatan Lembak Kabupaten Muara Enim Pelimbang, ari Selasa (17/8/2021) sekitar jam 08.30 WIB.
Kapolsek Lembak, AKP Sigit liwat Kanit Reskrim, Ipda Heri Defriansyah, membenarkan ade e kejadian pembunohan tersebot.
“Tersangka lah menyerahkan diri ke Polsek sekira jam 09.30 WIB. Saat ini sudah kami amankan namon kondisinya macem urang linglung,” kate pelisi pangkat Ipda, Heri Defriansyah. (Redaksi)
(Berita sengaja disadur dalam bahasa daerah orang Pangkalpinang dan Bangka agar masyarakat Bangka Belitung tidak lupa dengan bahasa daerahnya, sumber berita dari Prabumulih Pos)