Urang Mati Tekenek Covid Di Bangkek Belitong La Nue Tinggi Jangen Dak Pecaye Ade Covid
PANGKALPINANGPOST.COM (BABEL) – Pradek, ikak jangen cak-cak dak pecaye kek virus covid 19 ? Bukti e la banyak uang Bangkek kek Belitong mati (meninggal dunia) karena tekenek covid, ape agik pradek ade punya riwayat penyaket bawaan, macem penyaket paru-paru, jantong, gule (diabetes) kek yang laen e.
Virus covid ne ukan virus yang budu baga, die lebih pinter dari virus yang laen e.
Kate dokter ukan Kate ku ok’? virus covid ne die nyerang saat kondisi imun baden kite tengen lemah, teros die nyerang dimane tempet penyaket yang ade di baden kite, misal e mun ikak ade penyaket paru-paru disitu lah die nyerang e.
Sekedar info bai kek pradek, urang yang mati di Bangkek Kek Belitong tekenek kek covid la nue tinggi e, teritong dari ari kemaren Kamis (5/08/2021) yang mati tekenek covid sebanyek 784 urang, dan yang tekenek (terpapar) covid ditau kek kaben BPBD Babel 36.657 urang.
Nih, ikak liet sendirik data e yang ade dibaweh ni ok.
Jadi mulai sekarang pradek jangen dak nenger atau dak kenek dipadeh ok, jage kesehatan ikak kek keluarga, pakai teros masker e mun keluar rumah kecuali nek tidok dak usah dipakai, takot dak pacak benafas ulik kelak mati ukan karena covid tapi kurang oksigen.
Teros yang paleng penting, mun ade keluarga pradek yang la mulai demen, batok-batok, nyiom urang kentut dak ke bau agik, atau baden dirik la ngerase dak nyamen agik, cepet-cepetlah berubat ke dokter dirumah saket, ukan dateng kek dukon ok.
Mun kire-kire dirumah dak siapelah nguros e atau bakel nyelangket kek keluarga atau urang laen, along gek ikak mintak dirawat di rumah saket atau tempet khusos untok urang yang tekenek covid.
Teros jangen lupa ubat e dimaken secare terator, kek maken yang banyak ok… pukok e ikot anjuran pak dokter atau perawatan ukan ikot anjuran dukon ape agik dukon beranak.
Sekale agik pesan kami dari PangkalpinangPost.com jage kesehatan ikak dan keluarga maseng-maseng, jangen jadi urang ‘tugil’ atau dak kenek dipadeh. (Redaksi).